Stell dir vor, du wärsch Verkerhrsminister.
Dann woisch scho, was deine »Kollega« von dir haltat.
Denn du musch jo nur gucka, welche Leit so ida letzte Joar vor dir dra warat:
Scho so a baar interesseante Persenlichkeita und errinnersch die no an den, der des Wort »bescheuert« so im Nama ghabt hot?
Ma kennt grad moina, dass es beim Ministerposta zur Grundvoraussetzung ghört, da Versant an der Gardrobe abzumgeba. Deis isch wohl bei elle so, aber beim Verkehrsministerium bsonders.
Seis, wies will: Du bisch jetz halt Minister.
- was ibrigens vom Latinischa kommt. »Ministrare« soll wohl »dienen« hoißa, aber i denk, dia moischte Politiker hont koi Latinum und wenn doch, dann wohl a leicht bräunliches... -
Verkehrsminister sei
»Verkehrsminister Wissing warnt vor Auto-Fahrverboten an Wochenenden«
Südkurier 11. April 2024
Noi.
Es goat drum, dass eit ieber oin schwätzat und ma viel Wind macht – was dem Energieminister freia tät.
Es goat drum, Schuld von sich zum weisa und auf andre mit em Finger zum zeiga. Und ganz wichtig: Droh mit am Szenario, des jedem Autofahrere vor Schreck s’Herz in da Motorraum ruscht.
FAHVERBOT
Wärs it oifacher, endlich dia heilige Kua zum schlachta und des Tempolimit auf dia Autobahna eizumfiara?
Denn mol ganz ehrlich: Wer glaubt denn scho, dass dees mit dene Wochenendfahrverbote wirklick komma dät? I it. Und i glaub no an da Osterhas.
So als Minister isch es wichtig, au mol Profil zum zoiga. Profil isch dees, was an Reifa hon sollt, wenn er durch da Tüv muss.
In dem Fall goat it drum, schee und beständig sei Arbet zum macha.
Aber vielleicht hot der Wissing was gwisst, was mir it wissat, und sich denkt:
»Wenn i mit dem Fahrverbot droh, dann schluckat se dia Krott mit dene 130 KM/H auf dia Autoahna eher, und i kennt sogar no verdina, mit de Strofzettel, die bei Geschwindikeitsüberschreitunga affalat. Was ma jo dann au in da Klimaschutz stecka kennt.«
Aber ganz ehrlich:
Wenn i mir so dia Verkehrsminister alle aguck, wia se so warat, in de letzte Joar, glaub i it, dass dia so denkat. Wenn ieberhaupt.
14.04.2024
Kommentar hinzufügen
Kommentare